El guah.e, David Villa tamién da la cara pola oficialidá siguiendo los pasos del so mayestru "Quini" que ya se manifestare en delles ocasiones partidariu de la oficialidá de ka llingua asturiana. Villa retratóse col cartel «Yo doi la cara pola oficialidá» namás posar el pie n’Asturies de vuelta de la Eurocopa.

“Lliteratura”, la revista lliteraria asturiana espublizada pola Academia de la Llingua Asturiana y dirixida por Xosé Bolado, ta acabante de ver un númberu nuevu nel mercáu, el correspondiente al añu 2008, que suma 25 volúmenes a la llarga trayectoria de la publicación y qu’inclúi rellatos, poesía, ensayu y una entrevista d’Elena González a Milio R. Cueto.

El Centru de Cultura Vieyu Institutu Xovellanos de Xixón, va acoyer güei la inauguración de la esposición “50 Aniversariu del Festival Vaqueiru y de la Vaqueirada”, una amuesa onde va poder conocese la hestoria de la fiesta que se celebra cada añu na braña d’Aristébanu y que ta declarad “d’Interés Turísticu Nacional”.

Dempués del nomamientu de José Antonio Martínez, como nuevu Decanu provisional de la Facultá de Filoloxía pol Rector Vicente Gotor, la ex decana, dimitida la selmana pasada, Ana Cano, recordó ayeri que “basándose nel ReglamentuElectoral de Centros, Departamentos ya Institutos, el nuevu Decanu ha convocar elecciones”.

La canal privada autonómica ta acabante xubir a youtube.com la serie de dibuxos animos “El fara d’Illán”, que se dobló por actores asturianos en Madrid y que foi emitida pela canal asturiana nel añu 2002. La serien tien un total de venti capítulos. L’Academia de la Llingua Asturiana collaboró nel so día na grabación d’esta serie que taba titulada na so versión orixinal, n’inglés, col nome de “Salty's Lighthouse”.

Mañana xueves, a partir de les nueve la nueche, el Teatru Filarmónica d’Uviéu acueye la presentación-conciertu del grupu Tuenda, que va tocar los temes del so discu “Tuenda 2”. El llíder de la formación folk, Xosé Antón «Ambás», comentó que ta marcáu pola “continuidá” na presentación fecha’l miércoles pasáu nos locales de la Sociedá Xeneral d’Autores.

La diputada y llider del partíu UPyD, Rosa Díez, dixo esti domingu en Llanes que “la llingua oficial nel Principáu d’Asturies ye’l castellán y que lo demás, -refiriéndose al asturianu- son dialectos o formes de falar”.

El Rector averóse tres del encierru a falar con dellos protagonistes del mesmu y afitó otra vuelta que fadrá los posibles por retomar la situación, pero dende la feble perspeutiva cola que vien falando estos díes d'un compromisu que paez papel moyao.