Asturnews Curso de community manager
 

10/06/2011
Nacho Fonseca: "Xentiquina dexa un material bayurosu pa contribuyir a la normalización social del asturianu dende la escuela"
 

Xentiquina diz adiós pa siempres el próximu xueves 30 de xunu nel Auditoriu Príncipe Felipe d’Uviéu

Inaciu Galán

Nacho Fonseca

Nacho Fonseca (Uviéu, 1951) ye’l creador del célebre grupu asturianu “Xentiquina”. Maestru, músicu y miembru de l’Academia de la Llingua Asturiana, Fonseca pieslla agora la etapa del grupu coincidiendo cola so prexubilación. Sedrá’l próximu xueves 30 de xunu nel Auditoriu Príncipe Felipe d’Uviéu.

-Dempués de venticinco años al frente de Xentiquina, ¿cómo se siente al rematar esti proyectu?

-Toles coses tienen un principiu y un final y pienso qu’ésti ye un bon momentu pa terminar el viaxe de Xentiquina y dexar bien amarráu en puertu esti barcu nel que pasé cuasi media vida y nel que tuvi tan a gustu.

-Del entamu, ¿recuerda cómo se-y ocurrió la idea d’entamar Xentiquina, naquel momentu como Seliquín?

-Seliquín ñació na escuela de Porrúa. Daquella entamaba la escolarización en llingua asturiana y nun había cuasi nengún material didácticu. A min ocurrióseme que los cantares podíen ser una ferramienta amañosa y motivadora pa les clases d’asturianu y púnxime al llabor de componer dellos. La fortuna de cuntar con unos escolinos irrepetibles, que pa enriba cantaben perbién, facilitó muncho’l proyectu. Depués la suerte y la casualidá encargáronse de lo demás.

-L’ésitu de Xentiquina foi tal que llegó a esportase a la llingua gallega…

-Tuvimos la suerte de que se nos acoyere con cariñu, ye verdá. Efectivamente, el primer discu de Xentiquina tuvo continuidá en Galicia, tornáu al gallegu, cantáu por un coru de neños de Xove (Lugo) y espublizáu pol sellu Sons Galiza col nome de Xente Cativa.

-Y hai cantares que marcaron a una xeneración, como “¿Quién-y comió’l bocadiellu a Xuan?”…

-Ye posible. Ente los más de cien cantares pa neños que compusi y que tuvi la suerte de ver publicaos hai dalgunos que llegaron a los neños meyor qu’otros, como ye normal, y esi “Bocadiellu rock” ye ún de los que pienso que-yos llegó meyor.

-En 25 años, ¿sabe cuántos conciertos llegó a dar Xentiquina?

-Nun tengo un númberu esactu, pero anden al rodiu de los cuatrocientos, más o menos.

-Y al ser esti un grupu, por necesidá, dinámicu, pasaron munchos neños, ¿tiénlos contao?

-Como bien dices, Xentiquina ye una actividá escolar del C.P. de Lieres y ente les sos característiques, una de les principales ye la de la renovación parcial cada añu de los sos integrantes. Nun tuvi tampoco la previsión d’anotar toles neñes y neños que pasaron pel grupu, pero paezme que pasen llargamente del centenar.

-Dalgunos dedíquense güei a la música…

-Bueno, hubo dellos y delles que llueu de Xentiquina tocaron na banda de La Pola o cantaron nos coros de Siero Musical. Tamién Xurde, conocíu flautista del mundu folk asturianu, o la mio fía Esther siguen faciendo coses nesti campu.

-¿Qué oxetivos considera cumplíos con Xentiquina?

"Xentiquina" en 1985, cuando tovía yera "Seliquín"

-Pienso que Xentiquina, amás de la cariñosa acoyida qu’atopó en dixebraes estayes de la sociedá asturiana, dexa un material bayurosu de cantares que puen servir dende’l mundu de la escuela pa contribuyir a la normalización social de la llingua asturiana. Esi sedría l’oxetivu principal col que Seliquín y Xentiquina nacieron y col que creo que los cantares siguen collaborando.

-Llegáu esti momentu, ¿nun pensó na posibilidá de qu’otra persona siguiera col so proyectu o ye que nun atopó quién?

-Nun ye un problema de posesión de la “criatura”, pero paezme que ye más interesante qu’apaezan proyectos estremaos d’ésti, aires nuevos, persones con otru conceptu de la música pa neños, que vengan cola so propia idea… Esto ye lo saludable y lo deseable.

-Va poques selmanes recibía un homenaxe en Ribeseya pol so llabor a lo llargo d’estos años, ¿siente que reconocíu abondo’l proyectu de Xentiquina?

-Creo que soi una persona mui afortunada, porque tengo la suerte de que se m’afalague por facer daqué que siempre me prestó pola vida. Asina que’l proyectu de Xentiquina queda abondo reconocíu tanto colos homenaxes, que tanto agradezo, como coles pallabres de cariñu a esti proyectu que tanta xente me tien dicho.

-Na convocatoria del conciertu de despidida anuncien grupos convidaos y otres sorpreses, ¿pue avanzanos dalgún conteníu?

-La verdá ye que l’equipu organizador d’esti conciertu de despidida tien pa conmigo l’hermetismu qu’un pá tien pa col fíu les hores enantes de la nueche de Reis, y sólo me pasa pingaretes d’información d’esi conciertu del xueves 30 de xunu . De toes formes, sé que va espublizase un DVD y un doble CD con 24 cantares versionaos por estremaos grupos y artistes asturianos, y que nel conciertu van sentise les versiones en directu de dellos d’esos grupos ( el mio sinceru agradecimientu a toos) que versionaron a Seliquín y Xentiquina.

-¿Ye esta una despidida definitiva?

-Pienso que sí.

-La fin del grupu coincide cola so prexubilación, ¿qué proyectos tien en mente agora que va tener más tiempu?

-La mio prexubilación dexa pesllada una etapa personal y profesional perimportante pa min. Agora, con otra llave voi abrir un espaciu nuevu pal que nun tengo tovía una fueya de ruta. Yá veremos.


Compártilu

 
Otres Noticies
Mundu
Entrevista de la selmana
Sociedá
Educación
Música
Cine
Escéniques
Lliteratura
Conceyos
Plástiques
Política
Comunicación
Tecnoloxía
Fiestes
Mocedá
Hestoria
Cola ayuda de la Conseyería d´Educación, Cultura y Deporte del Principáu d´Asturies
© 2004 ASTURNEWS.com -
  |  Publicidá  |  Condiciones d'Usu  |  Información d'Empresa  |  Contacte con nós   |  RSS