| Cola so segunda actuación despídese del festival y cola p'Asturies
P.M.
Col meyor de aliendos foi como se despidió de Brenga Astur de los escenarios de Lorient, cuayando una perbona actuación nel Espace Marine, dientro d'una nueche folk compartida colos vecinos gallegos d'Unión das Terras. Brenga Astur ya ufiertói un conciertu mui aplaudíu nel Palacio de Congresos de Lorient na tarde del llunes.
Nel 1994, una riestra músicos d'estremaos conceyos d'Asturies entamaben esti grupu, Brenga Astur, que doce años depués amuesa equí en Lorient la calidá y veteranía de los años de trabayu. El so enfotu nel aniciu'l camín yera esparder el conocimientu de la música celta d'orixe asturianu, mesmo na so llinia más tradicional que notres estayes más averaes al folk, ya inclusu al folk-rock, y esa sigue siendo la so llinia como pudo vese nel Festival Intercélticu de la ciudá bretona nestos díes.
Los instrumentos emplegaos por Brenga Astur encartien cola llinia que güei ta puxando más nestos y otros países, esto ye que xunto a dalgunos tradicionales dafechu como les gaites asturianes en Si bemol, les xiblates irlandeses, el panderu asturianu, o'l curdión, tóquense dellos otros qu'arramen per dayuri como la guitarra acústica y elléctrica, el bouzouki, el baxu elléctricu, o la batería. En cualisquier casu cúriase con pricuru que les igües de los cantares seyan bien a xeitu col espíritu célticu que'l grupu quier tresmitir y que ye l'aliendu que lu fixera biltar.
Les actividaes públiques de Brenga Astur son mui bayuroses, participando en cuásique tolos alcuentros de folk célticu y tradicional que se faen n'Asturies, n'España o per otros países. Nesi sen, Brenga percorriera yá abondos llugares d'España, Sur de Francia, Italia ya Túnez, asina como delles xires pelos Estaos Xuníos d'América.
|
