Cubierta del Lletres Asturianes 97

L’Academia de la Llingua Asturiana ta acabante de poner nes llibreríes del país el primer númberu de 2008 del so boletín oficial, Lletres Asturianes. Esta entrega fai la 97 nos yá ventiseis años que lleva l’ALLA asoleyando esta publicación. L’Entamu d’esti númberu fala nesti casu de la elección de rector na Universidá d’Uviéu, onde l’Academia de la Llingua “nun va pronunciase”, pero sí va “vixilar los programes en cuantes a les promeses sobre l’asturianu y el so cumplimientu futuru per parte del candidatu escoyíu”.

La estaya de “Trabayos d'investigación” ábrela l’expresidente de l’ALLA, Xosé Lluis García Arias, col artículu "La dialeutoloxía nel dominiu llingüísticu ástur" y sigue colos testos "Edición filolóxica del sieglu XIII del Archivu Municipal d'Uviéu" de Jesús Menéndez Gómez, "Narrador y personaxe na lliteratura asturiana anterior a 1930" de Miguel Ramos Corrada, "La lliteratura grecollatina en llingua asturiana", un trabayu de Ramiro González Delgado premiáu na anterior edición de los premios de l’ALLA, "Imáxenes de muyer na poesía asturiana d'entamos del sieglu XX" de Xosé Lluis Campal y Aurora Sánchez y un trabayu en castellán "El uso de la lengua en los procesos administrativos" de José Mª A. Magán Perales, profesor de Drechu Alministrativu de la Universidá de Castiella-La Mancha.

La estaya de “Lletres vieyes”, dedicada a la recuperación de testos n'asturianu inclúi unes nueves versiones manuscrites de testos d’Antón de Marirreguera, estudiaes por Xosé Lluis García Arias.

Les “Lletres nueves”, estaya formada por aportaciones lliteraries de güei, inclúin poemes de Xuan P. Reyán y tornes de poemes del poeta monagascu Robert Roc, feches por Josep Carles Laínez.

Nel separtáu de “Notes y anuncies”, dase cuenta de les actividaes rellacionaes col facer llingüísticu, concursos, llibros, etc. Y nesti casu podemos atopar anuncia del II Conceyu Internacional de Lliteratura Asturiana, una torna oficial de la Carta Europea de les Llingües Rexonales o Minoritaries fecha pola ALLA pal Conseyu d’Europa y delles anuncies sobre premios lliterarios y d’otra mena.

Rematen esti númberu dos poemes navidiegos de Antonio González Busto y A.M. Vega. Amás del espaciu habitual dedicáu a les novedaes lliteraries y musicales n’asturianu.