Esti sábadu, día 12 d'abril, a les seis de la tarde, celebraráse una reunión pa formar oficialmente la delegación asturiana de l'Asociación de Madres, Padres y Familiares de Lesbianes, Gais, Transexuales y Bisexuales (AMPGYL).

Nestos meses un grupu de madres y padres asturianes, xunto coles sos fies y fios con orientación gai, lébica, bisexual y transexual implicáronse en delles actividaes organizaes pola asociación AMPGYL. Frutu de too ello fue'l viaxe a Zaragoza'l pasáu mes de payares pa participar na reunión estatal de families, la presencia n'Asturies de responsables d'AMPGYL asina como l'asistencia a la reunión de coordinación celebrada va poco en Rivas-Vaciamadrid.

Depués d'estes actividaes decidiose dar el pasu definitivu pala fundación d'una sección n'Asturies de l'Asociación de Madres y Padres. Por ello convidamos a tolos padres, madres y familiares de gais, lesbianes, transexuales y bisexuales a participar na asociación y a qu'asistan a la reunión fundacional que va celebrarase nel Conceyu Abiertu, Cai La Gascona 12 d'Uviéu'l próximu sábadu a les seis de la tarde.