Según informen na páxina “L’Asturies Lliberal” nos próximos díes un grupu promotores va aconceyar nun hotel de Mieres pa estudiar la creación d'un diariu en llingua asturiana. Según fontes averaes al proyectu, un grupu de promotores, formáu por empresarios, xestores culturales y profesionales de medios de comunicación, van aconceyar a primeros de mayu “pa entamar l'estudiu d'una iniciativa editorial que quier, ente más otres coses, facer posible l'apaición d'un nuevu periódicu diariu d'ámbitu asturianu, cola novedá de que s'editaría en llingua asturiana”.

Según informa l’Asturies Lliberal, “una de les opciones que s'analizarán contempla la participación d'una importante empresa editora de calter estatal”, cola que se tuvieren dellos alcuentros nes últimes selmanes. El grupu entamador, informa la páxina “apuesta por un mediu allugáu na centralidá política, asturianista y abiertu a toles sensibilidaes presentes na sociedá asturiana, que valga de calce p'amosar tolos enfotos que nazcan na nuestra comunidá autónoma”. Nel mesmu aconceyamientu esbillaránse tamién les diverses víes de trabayu na edición dixital y na producción audiovisual.

El proyectu sumaríase de facese realidá a l’actual ufierta de conteníos informativos n’asturianu, nes que s’incluyen páxines como Asturnews.com o la revista dixital lliteraira “Lliteratu”.