|
Redacción
Mañana xueves, a les 12 hores, l’Hotel Principado, n’Uviéu, va acoyer l’actu de presentación de Termast, un centru en llinia de terminoloxía en llingua asturiana que ta llamáu a revolucionar les posibilidaes terminolóxiques del asturianu. El centru TERMAST, del que surde esta iniciativa “ye l’encargáu de la coordinación xeneral de les xeres terminolóxiques n’asturianu y surde en xineru de 2009 al traviés d’una inciciativa de l’ALLA, el Colexu d’Inxenieros n’Informática y el colectivu Softastur.
L’oxetivu de TERMAST ye “proponer nuevos elementos terminolóxicos en llingua asturiana pa facer d’esti idioma una ferramienta afayadiza y útil nuna sociedá cada vegada más tecnificada ya interconectada”. A lo llargo de la presentación fadráse una demostración práctica del funcionamientu d’esti nuevu centru de terminoloxía, que va tar disponible na rede.
A la escontra d’otros entamos y propuestes normatives de l’Academia, TERMAST quier que seyan iniciatives individuales o grupales concretes les que dean a la conocencia pública la so particular propuesta de solución a los problemes terminolóxicos del asturianu nos estremaos contestos comunicativos: ámbitu científicu, de les nueves tecnoloxíes, económicu, sociolóxicu, humanísticu... Estes propuestes tarán al algame de los usuarios de la llingua asturiana, de mou que sedrán éstos —col so usu o refugu— los que dirán dándo-yos calter de normalidá, de mou que llueu d’ello l’Academia pueda dir inxiriéndolos dientro de los sos calces normativos.
La páxina web ta yá disponible y cunta cola primer propuesta, que cinca a Términos básicos d'Economía y Empresa y que ta presentada por Guillermo Ovidio Villa Balbona y Fernanda Valdés Rodríguez.
Más información:
Páxina web de la iniciativa TERMAST
|
